hlaupabóla #2 og #3…

Jæja þá eru allir fjölskyldumeðlimirnir nema mamman búnir að fá hlaupabólu á síðustu vikum. Bjössi tók sem sagt upp á því í vikunni að leggjast í hlaupabólu og Ari fylgdi fast á eftir. Brekinn er hins vegar orðinn alveg frískur, hann er reyndar enn með restar af bólum en þær eru þó óðum að hverfa! Ari virðist hins vegar ætla að sleppa vel og er ekki með neitt ógurlega margar bólur – samt alveg slatta, en þær angra hann lítið. Það er hins vegar önnur saga með Bjössa en hann er undirlagður og hefur bara sjaldan verið eins lasinn. Á fimmtudaginn stóð hann varla undir sjálfum sér en svo hefur þetta farið skánandi…hann er samt langt frá því að vera orðinn frískur. Það er sem sagt búið að vera hálf skrautlegt ástand á heimilinu þar sem það hittist svo illa á að ég var í lotu í skólanum frá því á fimmtudaginn…þetta slapp samt fyrir horn.

Jæja best að fara að snúa sér að lasarusum…kveðjur úr bólukoti

hlaupabóla…

Það er svo sem ekki mikið að frétta af okkur nema veikindastand. Arnar Breki er búinn að vera með hlaupabólu núna í rúma viku. Hún fór ótrúlega rólega af stað, við sáum merki um bólur á föstudeginum fyrir viku, kveiktum samt ekki að hlaupabólan væri mætt á svæðið.

Það var svo ekki fyrr en á sunnudagskvöldið að ekki fór á milli mála að um hlaupabólu væri að ræða, samt voru bara nokkrar bólur – en á þriðjudag að hann steyptist út í bólum. Hann slapp nú samt nokkuð vel frá þessu og virtist ekkert klæja neitt rosalega, enda vanur að kláða út af ofnæminu. Hann er hins vegar með sár á stærð við krónupening á enninu en samt alveg upp við hársvörðinn. Þar var stærsta bólan með mörgum litlum í kring en þetta varð fljótt bara að einu stóru sári. Nú eru bólurnar samt allar að hverfa og hann er búinn að vera hitalaus síðan á föstudag. Hins vegar hefur hann verið svo orkulaus að ég hélt honum heima í dag. Ari er svo líka orðinn lasinn en hann er með hita og kvef…þannig að hér er bara rosa stuð Það er spurning hvort að hann fái svo hlaupabóluna upp úr því!!

Jæja best að fara að huga að mat handa ormunum. Hér eru allir eitthvað svo þreyttir að það er eins gott að hafa matinn snemma.

B.kv. HB

annar og ani…

Ari er sem sagt farinn að myndast við að segja nafnið sitt og bróður síns. Reyndar hafa undanfarna daga bæst við mörg orð á dag. Hann hefur hins vegar fram að þessu ýmist kallað bróður sinn bróa eða mammi nú segir hann Annar eða Addi. Svo segist hann sjálfur heita Ani eða Benni en stundum segir hann Annar og hlær svo algjörum púkahlátri – veit að það er ekki rétt en finnst það voða fyndið

Annars er bara allt gott að frétta af stubbunum. Ari er reyndar búinn að vera eitthvað lítill í sér síðustu daga og þar til í morgun verið ósáttur við að vera skilinn eftir í leikskólanum. Ég held að tennurnar séu eitthvað að angra hann því hann hefur ekkert sofið allt of vel undanfarið og verið lystarlítill. Þetta virðist samt vera að lagast því hann var miklu hressari í morgun. 

Mamman er hins vegar ekkert allt of hress. Var sofnuð um 10 í gærkvöldi, þá komin með beinverki…svaf illa í nótt og er svo komin með hita núna. Því miður þá er bara enginn tími fyrir svona vesen, þarf að vera í hópavinnu í kvöld – verkefnaskil á morgun!!

Það munaði ekkert um veðrið hérna í fyrrinótt. Aspirnar hérna fyrir framan húsið hjá okkur hafa nú þolað ýmislegt en það brotnaði hellingur af þeim í rokinu. Við sváfum lítið fyrir látunum þar sem greinarnar slógust í þakið. Bjössi þurfti að fara út snemma um morguninn til að taka greinar af götunni (á stærð við sæmilega stór tré) því það var ekki hægt að keyra um götuna. Þetta verður nú samt að öllum líkindum í síðasta skiptið sem við þurfum að standa í þessu þar sem við látum líklegast fella trén í vor!! Það væri bara óskandi að hann nágranni okkar myndi gera slíkt hið sama því öspin hans skyggir svo á pallinn hjá okkur að við fáum litla sem enga sól eftir klukkan 4 á daginn.

Jæja þarf að fara að lesa framhaldsskólalögin og aðalnámskrá…mikið stuð

stubbarnir í tölvunni…

Hér er smá myndbrot með strákunum fyrir framan tölvuna. Þvílík innlifun hjá Ara en AB var eiginlega komin með nóg enda búinn að hlusta á Skítt með kerfið örugglega 10 sinnum í röð…Arinn fékk hins vegar ekki leið – alltaf sama stuðið þegar lagið er sett í gang

Endilega skrifið í gestabókina eða í responses hérna fyrir ofan (við hliðina á dagssetningunni) það er svo gaman að sjá hverjir kíkja…

Bubbi bybb bybb…

Bubbalagið þróast sífellt, nú er það Bubbi bybb bybb sem er sungið reglulega. Annars hafa þeir bræður frekar fyndinn tónlistarsmekk, hlusta að sjálfsögðu á gömlu góðu barnalögin en biðja samt jafn oft um Green Day, Coldplay eða jafnvel Damien Rice…foreldrunum finnst það afar hentugt þar sem ekki er bara gerð krafa um barnalög í bílnum. Annars eru lögin af gömlu Vísnaplötunni afar vinsæl þessa dagana og sofnar AB með Ég á lítinn skrýtinn skugga á repeat á kvöldin.

Eitt af því skemmtilegasta sem þeir bræður vita þessa dagana er að fá að horfa á myndbönd á YouTube og er þar Bubbi í 1. sæti, síðan kemur I´m a Gummibear (mjög vinsælt), svo Skítt með kerfið og hitt og þetta rokk. Arnar Breki biður líka reglulega um að hlusta á Ship og hoy með Dr. Spock og svo Mercedes Club. Tónlistarmyndbönd eru það eina sem Ari nennir að horfa á í tölvu eða sjónvarpi. Hann endist aldrei út kynninguna þó svo að hann biðji reglulega um að horfa á einhverjar teiknimyndir. Arnar Breki dettur hins vegar INN í sjónvarpið þegar hann horfir á teiknimyndir og þá er ekki hægt að ná sambandi við hann – svolítið líkur pabba sínum  

Annars hélt ég að hún systir mín myndi kafna úr hlátri í gær þegar við vorum að tala við hana á Skype. Arnar Breki þarf alltaf að leyfa henni að heyra einhver lög af YouTube og varð Gummibear fyrir valinu. Lagið var sett á, Arnar Breki fór INN í tölvuna hann var svo niðursokkinn og einbeittur og þá byrjaði Ari að sjálfsögðu að dilla sér eins og honum einum er lagið. Helga hélt fyrst þar sem þeir bræður sátu í fanginu á mér að ég væri að rugga honum…en nei hann sér sko alveg um þetta sjálfur Ég veit ekki hvaðan þessar hreyfingar koma en hann iðar allur, hristir hausinn, trommar og er bara í sínum eigin heimi…barnið gjörsamlega elskar tónlist.

Hann er loksins orðinn frískur greyið, sko Ari. Hann var hitalaus á fimmtudag og föstudag en var svo orðinn eitthvað slappur á föstudagskvöldið. Vaknaði svo með 39 stiga hita og eyrnabólgu á laugardaginn eftir erfiða nótt. Hann er því búinn að vera heima síðan og var orðinn frekar leiður á þessu í gær. Hann fékk því að fara í leikskólann í morgun og var frekar sáttur.

1. lotan í skólanum var um helgina, hún var fín en ég er enn þreytt eftir þessa törn. Nú er allt bara að fara á fullt í lestri en ég hef því miður ekkert getað sinnt því, verð að setja í fluggírinn í kvöld. Bjössi er svo að byrja í skólanum í dag og verða miðvikudagar því ekkert voða skemmtilegir hjá okkur. En þessar vikur verða fljótar að líða. Mér til mikillar ánægju þá verðum við bæði búin í skólanum í lok nóvember…mér finnst æðisleg tilhugsun að vera ekki í verkefnaskilum í desember.

Jæja ég ætla að reyna að henda nokkrum myndum inn á Barnaland áður en ég rölti af stað til að sækja strákana

kyss og knús, hb

baaa ba bobb bobb…

Þetta syngur Ari núna allan daginn og fyrir þá sem ekki skilja þá þýðir þetta Bubbi Byggir eða Bobbi eins og Ari kallar hann Bubbi er bara aðalmálið þessa dagana og hann biður reglulega um að fá að horfa á Bubba og stillir sér upp í sófanum…hann er hins vegar ekki mikið fyrir sjónvarpsgláp þannig að hann horfir oftast bara á kynninguna með laginu og er svo þotinn!!

Annars er stubburinn eitthvað lasinn í dag. Hann var kominn með hita í gær þegar við komum heim og var hundslappur. Hann var nú samt ekki alveg að fíla það að fá ekki að fara í leikskólann í morgun og reyndi að klæða sig í útiskóna þegar Arnar Breki var að fara. AB var hins vegar frekar fyndinn þegar hann var að kveðja bróður sinn og sagði: „þú þarft að vera heima elskan mín af því að þú ert slappur, en svo sjáumst við í dag“  

Svo er skólinn að byrja á föstudag hjá mér, ég er komin með smá hnút í magann því ég á von á að þetta verði svolítið strembin önn. Ég verð í 10 einingum í skólanum og ætla svo líka að reyna að nýta morgnana á vinnustofunni, Bjössi heldur svo áfram í verðbréfanáminu (byrjar eftir viku) og verður í tímum 2x viku í 4 klst. í senn, þannig að það verður nóg að gera hjá okkur fram að áramótum. Það verður hins vegar bara að koma í ljós hvað ég get myndlistast – læt skólann ganga fyrir en næ samt vonandi að vera einhverja morgna að mála. Eftir áramót verður samt mun rólegra því þá verð ég bara í einu fagi (5 einingar) og Bjössi á þá mjög lítið eftir í sínu námi – held að hann klári í febrúar/mars.

Ari er sofnaður svo ég ætla að reyna að nota tímann í að klára að fara í gegnum skápana – er í því að undirbúa heimilið fyrir veturinn

knús á línuna, HB

“nýjar” myndir á barnalandi…

Ég setti í gær inn á Barnaland heilan helling, 5 mánaða skammt, af leikskólamyndum…geri aðrir betur Myndirnar eru í 2 albúmum: Hólmasól – apríl/maí/júní 2008 og Hólmasól  júlí/ágúst 2008. Það á líklega eitthvað eftir að bætast í seinna albúmið. Sömuleiðis er von á fleiri fjölskyldumyndum en ég rakst á helling af myndum frá Tenerife sem bara gleymdust og svo á ég eftir að setja sumarmyndirnar inn…þetta hefst vonandi í vikunni.

Jæja farin að sækja stubbana,

kv. HB

mömmur eru alltaf svo mikið að ganga til…

AB tilkynnti mér þetta upp úr þurru í bílnum um daginn. Þetta átti sem sagt að vera mömmur eru alltaf svo mikið að ganga frá eða laga til…hann slær þessu alltaf saman. Það eru nokkrir svona hlutir sem hann segir alltaf vitlaust t.d. segir hann alltaf ég slag í staðinn fyrir ég skal, samt veit hann alveg hvort er rétt

Það gengur svona glimrandi vel með báða bræðurna í aðlögun í leikskólanum. Ég skildi Ara eftir í fyrsta skiptið í gær. Það gekk bara rosalega vel og þó svo hann væri glaður að sjá mig þegar ég kom að sækja hann þá vildi hann ekki fara heim. Ég átti ekki alveg von á þessu þar sem hann var svo kvefaður að ég var alveg komin að því að halda honum heima um morguninn en þorði svo ekki að taka sénsinn á að eyðileggja aðlögunina. Í morgun var hann svo ekki vaknaður þegar AB var tilbúinn svo Bjössi fór bara með AB í leikskólann um 8 og ég leyfði Ara að sofa aðeins lengur þar sem ég átti alveg eins von á að hann væri lasinn. Hann vaknaði hins vegar eldhress og leið miklu betur. Við mættum því á leikskólann um kl. 9. Ég stoppaði í svolitla stund, var meðan setið var á plássi og sungið. Ara fannst þetta mjög spennandi og sat meira að segja kyrr!!! Svo í hópatíma fékk hann að fara í leikstofuna sem honum fannst mjög spennandi enda hefur hann oft komið þangað. Þá spurði kennarinn hvort að hann vildi ekki kveðja mig og hann kom og kyssti mig og vinkaði mér svo bara…ekkert mál  

Svo átti ég nú von á drama þegar ég kom fram í forstofu því þá mætti ég AB sem var á leiðinni út. Hann skildi ekkert hvað ég var að gera og spurði ca. 30 spurninga eins og vaninn er. Ég sagðist ætla heim en nú væri Ari líka á leikskólanum eins og hann. Hann var sáttur við það og sagðist vera á leiðinni út með Guðna, sem er nýji kennarinn hans á Gula kjarna, síðan var hann bara hlaupinn…ekki alveg viðbrögðin sem ég átti von á.

Ég veit ekki alveg hvað ég á að halda með hann Ara en það lítur út fyrir að hann sé líka með fiskiofnæmi – því miður því honum finnst fiskur mjög góður. Hann fékk fisk í gær og er með útbrot í andlitinu og var með niðurgang í morgun. Hann þoldi ekki að ég borðaði fisk þegar ég var með hann á brjósti svo ég tók hann út og hef ekki þorað fyrr en fyrir stuttu að gefa honum fisk. Hann hefur verið að fá pínu smakk og það hefur verið í lagi. Hins vegar fékk hann heila máltíð í gær sem er líklegast ástæðan fyrir þessum útbrotum og niðurgangi. Ég sem var að vona að hann væri ekki með fiskiofnæmi eins og AB. Mig grunar samt að hann þoli bleikan fisk, sem væri voða fínt að geta gefið honum einhvern fisk. Þetta er svolítið mikið hjá þeim bræðrum þegar þeir mega ekki fá mjólkur-eða sojavörur né fisk. AB er samt ekki eins viðkvæmur lengur (nema fyrir fiskinum) og er farinn að getað smakkað pínu ost – sem honum finnst mikið sport. Þetta gekk voða vel í vor en svo þegar frjóofnæmið kom upp hjá honum þá fór allt í flækju og það var eins og hann þyldi ekki hluti sem hann var farinn að þola…líklega bara of mikið álag á ónæmiskerfinu, enda var hann mjög slæmur af frjóofnæmi. Sem betur fer er það aðeins farið að lagast.

Jæja það er svo mikið sem ég á eftir að gera áður en ég sæki Ara en hann á að vera í hádegismatnum í dag svo ég sæki hann klukkan 12.

ciao, HB

arinn byrjaður á leikskóla…

Ég er búin að vera í verkfalli á heimasíðunni og bloggi…og systir mín er eitthvað farin að kvarta Ég hef bara hvorki haft tíma né nennu til að sitja við tölvuna í sumar, það hefur í mesta lagi gefist tími til að tékka á tölvupósti!

Annars höfum við haft það voða gott í sumar. Bjössi og Arnar Breki fóru í sumarfrí 7. júlí og voru í fríi í 4 vikur. Þessar vikur hreinlega flugu hjá þrátt fyrir að við værum að mestu heima. Helga systir kom frá DK 11. júlí og var fram til 27. júlí…Brekinn var mikið í heimsókn hjá henni sem og báðum ömmum sínum. Það mátti varla nokkur koma í heimsókn án þess að hann spyrði hvort að hann mætti fara með þeim heim. Við fórum í dagferð í Mývatnssveit með ömmunum og Helgu sem var rosalega skemmtilegt en þar fyrir utan eyddum við góðviðrisdögunum að mestu á pallinum okkar en við höfum mikið borðað úti, leikið í húsinu, sullað í vatni og farið í pottinn.

Á miðvikudaginn í síðustu viku fór svo Bjössi aftur til vinnu og Arnar Breki í leikskólann svo það er aftur að komast meiri rútína á hjá okkur. Á föstudaginn átti Bjössi svo afmæli og við brúðkaupsafmæli á sunnudaginn. Hann var nú reyndar hálflasinn á afmælinu sínu en hann fékk nú samt köku – sem AB skreytti.

Í gær var svo fyrsti leikskóladagurinn hans Ara. Þeir bræður eru báðir í aðlögun núna því Arnar Breki flytur upp á Gula kjarna á mánudaginn. Ég hitti þann sem verður með hópinn hans og leist rosalega vel á hann. AB verður líka glaður þegar hann fær að vita að hann verður bæði með Degi Mána og Birgi Orra í hóp en þeir eru bestu vinir hans. Aðlögunin gengur voða vel hjá þeim báðum þó það rugli AB þó svolítið að ég sé að þvælast þarna á morgnana. Hann er samt voða spenntur yfir því að bróðir hans sé að byrja og tilkynnti mér í morgun að ég ætti svo að fara og þeir yrðu tveir saman á leikskólanum. Ari stendur sig líka voða vel og er nokkuð sama þó að ég láti mig hverfa. Á morgun á hann að prófa að borða með strákunum og taka lúrinn sinn…stóri bróðir verður líklega hæstánægður með það.

Jæja þá er best að drífa sig og laga aðeins til hérna á meðan stubburinn sefur, ég set svo myndir inn við tækifæri en lofa engu fyrr en í vikulok

Æji já gleymdi einu, ég var að fá mér vinnustofu svo nú ætti ég að fara að komast í að mála. Hún er til húsa á 2. hæð í JMJ húsinu, rosalega björt og fín. Ég verð reyndar líka í skólanum í vetur en eftir áramót verð ég sennilega bara í 5 einingum svo þá ætti að losna meiri tími til að mála.

b.kv. HB

var að setja inn myndir á barnalandssíðuna :)